ياباب العلم ياقالع الباب للشاعر يحيى العلاق

ياباب العلم ياقالع الباب
ابن عم النبي اوسره اوذراعه

شوصفك ونته طاعه اوتمشي عالگاع
دگلي اشلون تتوصف الطاعه

اسمك من زغر بالروح محفور
الحفر ميروح مو مثل الطباعه

اذا يعجز الساني اتشوفه بالعين
اوگبل هاي العيون الگلب ذاعه

كل هذا واريد الاذن تحجيه
حتى الثانيه اتذوب ابسماعه

ماصلي جماعه ابعذر مشروع
اصلي ابمفردي اوعندي القناعه

علي الينعد بلف بس اسمه ينگال
صلاة الفرد تتحول جماعه

التعنالك مشي صح يتعب اهواي
السبب مو للمشي اوقلة متاعه

بديهياً يعود البيته تعبان
گد مايرجع امحمل شفاعه

علي هوه العدل وجفوفه ميزان
سوگه الحرب وأعداءه البضاعه

مرحب من برز ماطول اوياه
حسب بالسيف عرضه اوارتفاعه

وبلمح البصر سواه وصلتين
گصه اووزنه اوللموت باعه

اوابن ود ابتلى اوصاح آنه ملاح
غشيم اشورطه ابحر الشجاعه

صفه جسمه سفينه اموسده الگاع
اوسيف المرتضى صاير اشراعه

(لو كان الفقر) اي والله مولاي
الفقر لو رجل ماخليته ساعه

يقيناً جا تبعته الآخر الكون
اوسگيته الموت ثأراً للمجاعه

واكيد الحسن يطلع اكرم الناس
نبات الطيب يتبع طيب گاعه

وذا احسين الشمس والگمر عباس
ابوهم بيش يتقدر شعاعه

من گبل العلم والاكتشافات
اوگبل عصر التطور ولصناعه

على گال الحديد ايعلي ويطير
اوعلم ربك براءة اختراعه

اليتامه اتيتمو من راح ابو حسين
لان محد ابحقهم بعد داعه

اوناحتله الطيور اومرود الباب
قبل مأزره ابلحظة وداعه

العمل لو مستحب لو واجب ايكون
اوعلي المستحب واجب اتباعه

اوكل حب بالگلب شي هذا معروف
بس ليحب علي حبه ابنخاعه